نعم للسيسي رئيساً للجمهورية … بقلم #أحمد_ماهر

آه والله .. زي ما بقولك كده .. نعم للسيسي رئيساً للجمهورية .

أنا الموقع أدناه واللي إسمي أحمد ماهر , واللي بيقولوا عليا كل الإتهامات والأساطير اللي تم إختراعها أو لسه هيخترعوها بقول و أنا في كامل قواي العقلية نعم للسيسي رئيساً للجمهورية ، ومش نعم واحدة بس .. نعمين كمان .

وليه لأ !!! هنلف وندور على بعض ؟!!! هو فعلاً رجل المرحلة . ولكن أسبابي مختلفه عن كل اللي بيشجعوا السيسي وبيدفعوه للترشح , سواء فلول أو كنبة أو أحزاب , ونخبة فاشلة عمرها ما هتعمل حاجة وعمرها ما هتقبل غير الفتات من العسكر والفلول وعمرها ماهتقدر تنافس حد ، خلي الناس تشوف بعنيها وتجرب بنفسها .. خلينا نخلص .

الناس جربت الإخوان وشافت الغباء والعناد والكذب , خليهم يجربوا حكم العسكر هو و الفلول للسلطة .

مع إن أساسا حكم العسكر لم بنتهي يوماً واحداً منذ 26 يوليو 1952 ، حتى بعد التغيرات اللي حصلت بعد هزيمة 67 اللي حصلت بسبب إستبداد العسكر و إلتفاتهم للملذات الشخصية والنزوات ، وبعدها بدأ يبقى العسكر أقل ظهورا و أقل فجاحة في الإنحراف والبحث عن الملذات , و رغم عهد السادات اللي خلع البدلة العسكرية ولبس البدلة الملكي أو المدني , ولكن برضه فضلوا مسيطرين على كل شئ من خلف الستار .

و كذلك في عهد مبارك ,, رجال الأعمال و العصابة ماسكين البلد , لكن ليهم حدود محدش يقدر منهم يقرب جنب إمبراطورية العسكر و مزارعهم و مصانعهم و قصورهم و أراضيهم .

حتى في عهد مرسي “منه لله” محدش قدر يقرب من إمبراطورية العسكر و مصالحهم الخاصة وصفقاتهم السرية , وتحكمهم في الحنفيات الرئيسية .

ف ليه يستمروا في الحكم من خلف الستار ؟!!! خليها فاشية عسكرية صريحة .. مش الناس عايزة كده ؟؟!!! خلااااص .. خليهم يجربوا الفاشية العسكرية الصريحة , و العقلية العسكرية في الحكم .. إلبس علشان نازلين .

خلينا نشوف حلول العسكر للمشاكل الإقتصادية و الإجتماعية , مع إننا شوفنا الطريقة خلال الـ 60 سنة اللي فاتوا , بس خلي الناس تشوف تاني .

خلي الكتاب و الصحفيين يشوفوا حرية الصحافة وحرية التعبير في عهد “السيسي” , و خلي كل صحفي منافق يحس بالجريمة اللي عملها ، و كل كاتب بيطبل دلوقتي للسيسي يعرف حدوده في فترة حكم السيسي ، أيوه بقى خلونا نرجع لأيام “ممتاز القط” و طشة الملوخية بتاعة زمان .

مش الأحزاب الليبرالية و اليسارية والقومية عايزين “السيسي” علشان ينقط عليهم شوية منح ومناصب ؟!! خليهم يأخدوا الصابونة و يشوفوا الفلول اللي هيطلعوا لهم لسانهم , أصل العسكر ملهومش غير الفلول .. والفلول ملهومش غير العسكر , وجت النخبة الحزينة تفرح مالاقيتلهاش مطرح .

ومش الأحزاب الناصريين عايزين “السيسي” يكرر تجربة “عبد الناصر” تاني ويشكمنا , ويرجع عهد الدولة الشاكمة اللي محدش فيها يعرف يفتح بوقه ؟!!! خليهم يشوفوا “السيسي” وإنحيازاته بنفسهم ، “السيسي” اللي إتدرب في أمريكا ومرتبه من أمريكا .. وميقدرش يعمل حاجة بدون التنسيق مع أمريكا و إذن من إسرائيل .

خلوهم يشوفوا بعنيهم السيسي هيعمل إيه في العمال والقطاع العام ومكتسبات عبد الناصر .

خلي اللي كانوا حقوقيين يشوفوا حال حقوق الإنسان هيبقى عامل إزاي وقتها ، وخلي الناس تشوف تعامل الشرطة إزاي وقتها .

و بالمرة أفكركم بشوية حاجات ..

فاكرين يوم موقعة الجمل ؟؟!! يوم إعتقال عدة مجموعات في نفس وقت الهجوم على التحرير ، المجموعة اللي كانت بتزور البرادعي .. والمجموعة اللي كانت في المركز المصري ومركز هشام مبارك للقانون . أكيد بعض الناس دول بيحاولوا ينسى أو يتناسى خصوصا إن منهم من يحاول إيجاد مكان بالقرب من السلطة .

لكن اللي منسيش , ممكن يكلمنا عن اللي حصل معاهم إيه في مبنى المخابرات الحربية وهم متغميين ومتكلبشين إيد ورجل ؟!! فاكرين الضرب والتعذيب ؟؟!!! فاكرين صوت السيسي وتهديداته ؟!!! يا عملا يا خونة يابتوع كنتاكي والإينجليش لانجويش ؟؟!! فاكرين تغير موقف “السيسي” أثناء التحقيقات معاكم جوه لما عرف إن ملايين نزلت التحرير بعد موقعة الجمل ؟؟!!

“السيسي” مدير المخابرات الحربية وقت مبارك و وقت طنطاوي , اللي أخد ملفات أمن الدولة وكمل شغلهم , و التنصت على التليفونات وقت الثورة وبعدها .

فاكرين ؟؟!!! طب حد يقدر يفكر الناس باللي حصل جوه عند السيسي ؟؟!!

طيب بلاش دي … أسلوب المخابرات الحربية في إنتزاع الإعترافات ، المخابرات الحربية اللي كان ماسكها السيسي ، فاكرين 9 مارس 2011 و 8 ابريل 2011 وغيرها وغيرها من الحوادث اللي حصل فيها تعذيب وتحقيقات غير قانونية وإرهاب للنشطاء ؟؟!!

فسسسس .. كله بينسى ؟!!!! .. لأ مش كله الحمد لله .

عموما خلونا نخلص , و زي ماشوفنا بعنينا مساوئ و كوارث حكم الإخوان , خلينا نشوف حكم العسكر الصريح بدل المستتر ، خلي الثورة تقوم على نضافة بعد حكم العسكر .

خلونا نشوف بجد القمع والقتل والإعتقالات وشغل صلاح نصر بتاع زمان , خلونا نشوف عهد ناصري جديد ولكن بدون عدالة إجتماعية وبدون زعل إسرائيل , عبد الناصر السيسي 2014 اللي إتدرب في أمريكا و ميقدرش يزعل إسرائيل و بينسق معاهم قبل أي خطوه في سيناء .

والجواب باين من عنوانة .

و خير عموماً .. كده نخلص المعارك بدري بدري .. وبعد سنين نبني على نضيف , عرفنا الفاشية الدينية , و لازم الناس تشوف بعنيها الفاشية العسكرية و الفشل والإستبداد اللي هيوصل لإحتراب أهلي و إنهيار إقتصادي .

وبناء عليه :

أقر أنا الموقع أدناه وأنا في كامل قواي العقلية تأييدي لترشيح “السيسي” لرئاسة الجمهورية .

خلينا نلبس , نجرب , ونشتغل على نضيف بعد كده .

أحمد ماهر
ليمان طرة
6/1/2014

15 thoughts on “نعم للسيسي رئيساً للجمهورية … بقلم #أحمد_ماهر

  1. احمد داس على الدمل و خليهم يشوفو مصر و طول ما البيادة متشاله على الراس و منداس على الفقير و المسكين

  2. يا راجل ده انت من جوا السجن و بتكتب و تنتقد و تقل فى ادبك ولا حد كلمك عاوز ايه حرية اكتر من كدة هههههههه
    وبعدين ما تسترجل انت و تطلع لنا اقرار زمة مالية حلو نضيف كدة تعرفنا فيه انت عايش منين ؟؟؟

  3. هل يستوى غباء الإخوان السياسي وفشلهم الإداري مع فساد السيسي الملحد ومن قبله حكم العسكر كله؟ هناك دائماً حقٌ فيه باطل، وباطل متلبس بحق، والحق الصرف ليس الليبرالية يا أخ أحمد. بل هو الإسلام كما ارسل به محمد صلى الله عليه وسلم، لا كما نشرته الإخوان ولا غيرها.

  4. لو انتم شايفين ان الاخوان في سنة واحدة عملو كوارث وتصالحو مع العسكر امال انتم علمتو ايه لما صنعتو للانقلاب غطاء ثوري وتحالفتو معاهم ومع الفلول في 30 ستة ووصلتونا للي احنا فيه لو عاوزنا نبدأ من جديد لازم كله يعترف بأخطائه بشجاعة وأولهم انتم

  5. سيادتك طبلت للسيسى مع المطبلين وأنت مثلهم من المنافقين….بلاش تعمل فيها بطل لأن تغير موقفك شببه الوحيد إن السيسى قلب عليك

  6. مابدري ياسي أحمد! مش حضرتك كنت عايز تلف العالم تقول لهم اللي حصل ثورة مش انقلاب! والا كنت ناسي وقتها اللي حصل في المخابرات الحربية وصوت السيسي وتهديداته؟!! مش الإخوان أغبياء أومال حضرتك تبقى إيه؟!! مش الإخوان بيعاندوا ويكدبوا؟! أومال إنته وشلتك عملتوا إيه؟! هان عليكم دم إخواتكم المصريين بس لأنهم بيأيدوا مرسي وماحدش منكم قال كلمة حق غير لما ربنا انتقم منكم ورموكم في السجن! بتقول على عهد الإخوان فاشية والعالم كله بيشهد إنه عهد حرية بس لأنك مصر ماتغيرش رأيك!! إنت عارف إنته والشويت عيال بتوع ستة إبريل بغباءكم المتناهي عملتوا إيه بالضبط! ببساطة خنتوا الثورة ودم المصريين!اشبعوا سجن بقى عشان مرسي كان فاشي

    • م. أحمد ماهر لم يشارك مع المجموعة اللي لفت العالم، عرض عليه المر ولكنه رفضه وتقدري تراجعي مواقفة وتصريحاته .. اما بالنسبة لمن خان الثورة فمن خان الثورة هو أول من ترك الميدان و خالف اجماع الميدان .. لما الميدان كان صوت واحد وبيطالب بالقصاص والتطهير والدستور اولا خرج الاخوان عن الجمع وقالوا الانتخابات اولا
      اللي خان اللي قال على المطالبين بالقصاص واستكمال مطالب الثورة بلطجية
      اللي خان اللي كرم طنطاوي و عنان في الوقت اللي كنا عايزين نحاكمهم على جرائمهم
      اللي خان اللي عين السيسي وزير للدفاع وهو يعلم جيدا دوره في كل ما يحدث
      اللي خان اللي زود مرتبات الداخلية و كرم قياداتها وزود تسليحهم بدون ادنى مقابل ولا حساب ولاقصاص للي ماتوا

  7. واللي زيك وامثاله عملوا ايه للبلد بعد الثوره سبتوها للاخوان والمجلس العسكري وهجيتوا عارف ليه عشان انتو متدربتوش غير لحد هنا اسقاط النظام طب وبعد اسقاط النظام مفيش اي حاجه فكرتو تعملوها للبلد غير انه كله يتحالف مع اللي هيديله مصلحه اكتر ..نجحتو انكم تخربو ومقدرتوش تبنوا وتعمروا ..هو المجلس العسكري لو كان لقى رجاله قامت بالثوره على حق مكنش اداها للاخوان .. ولو الاخوان مكنوش ضبطوكو صح مكنتش هتتسلم لهم على طبق من فضه ..اقولك حاجه حلوه سيبك من البلد دي ودورلك على بلد غيرها

  8. قالك فاشية دينية !!!!

    فاكر ياثورجى التظاهرات اللى بالبرسيم والأندر وير عند بلطجى الداخلية,ومقدرش يتعرضلكوا لأن وقتها كان الحاكم مدنى.

    فعلا والله الكبر والغرور ماليكم بشكل بشع.

  9. ماهو زى ما الأخوان غلطو، انتو كمان غلطو و ايدتم السيسى، هل كنتم تعتقدون انه سيعطيكم ديمقراطية بتأيدكم له، كلامك ده يدينك مثل الجميع، انت صحيح بعد كده اعلنت عدم موافقتك على ما فعل السيسى بس بعد فوات الاوان.
    لذلك ياريت انتو كمان زى الاخوان تعترفوا بأخطائئكم فالاعتراف بالحق فضيلة و ان تأتى متأخرا خير من الا تأتى ابدا. لذلك فليعترف الكل بأخطائه بدلا من رمى اتهامات على الكل و المستفيد الوحيد هو العسكر.

  10. هو لازم نكرر اخطائنا مليون مره علشان نتعلم وبعد كده نثور علي نظيف ومين قال الناس عايزه السيسي يا اخي في ملايين مش عايزينه بس الاعلام مركز علي مؤيدين المنتفعين والمغيبين والجهله ليه الاستسلام ده انت عايز ترشحه براحتك بس خلي التاريخ يسجل موقفك احمد ماهر بيقول نعمين للسيسي رجل المرحله انما الثوار اللي علي حق مكمليين

  11. الي انتا بتقولو صح بس لازم كله يعمل دوره وفهم اللي مش فاهم علشان تبقي عملت اللي عليك
    بس اتصور ان السيسي لو جيه انسي ان العسكر يمشو ولو بعد 200 سنه

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s