يعني مش هانشوف باسم يوسف؟ انت حابسنا يا عم ولا إيه؟

 

– باسم يوسف جاي النهاردة
– بجد ؟ على ايه ؟
– على ام بي سي مصر.

– يا خسارة مش هانعرف نشوفه النهاردة.
– هو ينفع نشوفه على التليفزيون المصري في الاعادة؟
– لأ عمره ما جه على التليفزيون الأرضي.. وبعدين هو احنا عندنا تليفزيون اساسا!
– طب مش هينفع نشوفه على اليوتيوب
– هههههههههههه
– ولا ينفع طبعاً حد يجيبه متسجل على آي بود أو شاشة عرض.
– هو إحنا في سجن ولا إيه؟
– تصدق إحنا في سجن !!

حسيت فعلاً اني محبوس واني في سجن لما لقيت اني مش هاعرف اشوف باسم يوسف.
مش معنى كده إن السجن تمام وفندق زي اللي عند مبارك وجمال وعلاء وآحمد عز … لأ بس كنت بدأت أتعود على الحبس الانفرادي والتكدير الـ 24 ساعة وعدم تمكني على مشاهدة باسم يوسف خلاني أفتكر تاني إني في سجن.

“انت في سجن يا بشمهندس .. لازم تنفذ اللي نقولك عليه” … هكذا قال اللواء أحمد راتب مساعد وزير الداخلية لقطاع السجون لما طلبنا زيادة وقت التريض والسماح بوسائل إعلام.
“الوقت غير الوقت والدنيا غير الدنيا وانتم غير أي حد” .. هكذا قالوا عندما ذكرناهم اننا لما كنا محبوسين أيام مبارك كان فيه تليفزيون ومراسلات وكان كمان مسموح بـ آي بود من غير كاميرا ومتسجل عليه برامج ولقاءات الأسبوع.. آه والله … يالا ما علينا .. بلاش نعيد اللي قلناه تاني.

الدولة القمعية والأمنية مش هاترجع تاني … هي أصلا ماراحتش في حته قبل كده
أحنا دلوقتي عموماً في عهد اسوأ من عهد مبارك وسيبك من السجون ، دلوقتي اللي بيحاول ينظم مظاهرة سلمية بينضرب بالنار قبل ما يبدأ.

عجبني قوي مصطلح “نيو ناصريزم” عهد ناصري جديد ولكن غير معادي لأمريكا وإسرائيل وبياخد معونة.

يوووه .. ما علينا … نرجع تاني لباسم يوسف .. بلاش كلام في السياسة.

اللي بيتكلم في السياسة بيروح السجن دلوقتي ومش بيعرف يتفرج على باسم يوسف.

باسم يوسف هو الوحيد اللي بيعرف يقول اللي كل واحد عايز يقوله باسلوب غاية في الروعة والجراءه والذكاء.

قال اللي جوانا بالظبط أيام المجلس العسكري وأيام مرسي ومالحقش يقول حاجة أيام السيسي.

سخر من عكاشة وأنصار المجلس العسكري وتامر بتاع غمرة وكلامهم العبيط، وسخر من مرسي وأخطاؤه وهبل تصريحات أنصاره وهمجية بعضهم، وحتى الثوار وأخطائهم أيام الاعتصامات، وسخرمن رموز المعارضة أيام مرسي ومن تخبط جبهة الانقاذ، ومن طنطاوي وعنان،  بس السيسي ما استحملش حلقة واحدة بتنتقد تقديس السيسي وبتسخر من صناعة فرعون جديد.

ياللا … لما أبقى أخرج بعد الـ 500 سنةأبقى أتفرج على حلقاته على اليوتيوب … فيه واحده اسمها نائلة عمارة على راديو 90.90 قالت أحمد ماهر مش هايخرج من السجن قبل 500 سنة، ربنا يبشرها بالخير
هانت

المهم اللي يشوف باسم يوسف يوصل له سلامي
البرنامج حاليا بقى هو النافذه الأخيرة … كله تم تأميمه وتكميمه أو أرهابه

أحمد ماهر
ليمان طره
7-2-2014

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s