دولة القوات المسلحة الشقيقة

تخرجت من كلية الهندسة في صيف 2004 وبدأت حياتي بعد أيام من التخرج كمهندس مدني في شركة مقاولات صغيرة، وكلفني مدير المشروعات بتولي عملية إنشاء فيلاتين في القاهرة الجديدة.

“خلاص نبدأ شغل من بكرة ونتقابل بكره في القاهرة الجديدة عند الجهاز” … هكذا أنهى مدير المشروعات الانترفيو بعد قبولي في الوظيفة.

“طيب أروح إزاي القاهرة الجديدة ماروحتهاش قبل كده” .. هكذا كانت إجابتي عليه.

إتصرف .. إنت مهندس مدني لازم تتصرف في أي مشكلة .. أشوفك بكرة 7 الصبح عند الجهاز.. هكذا كانت إجابة المهندس مدير المشروعات لي وأنهى المقابلة وتركني في حيرة شديدة.

 

سألت كيف سأذهب للقاهرة الجديدة ونجحت في ذلك وكنت بالفعل في تمام الساعة السابعة أمام مبنى جهاز المدينة أتسلم لوحات الفيلات التي سوفأقوم بتنفيذها.

 

أعجبتني مدينة القاهرة الجديدة بشدة من حيث تنظيمها واتساع الشوارع وإتساق المباني وقررت أن أسكن في هذا المكان وأخرجمن القاهرة القديمة المزدحمة العشوائية.

سألت عن أسعار الشقق وهالني الأسعارالمبالغ فيها (كان المتر بـ1000 جنيه.. وكاش) يعني شقة 100 متر بـ 100 ألف جنيه وكاش، طبعا السعر تضاعف حاليا 4 – 5 مرات ولكن هناك عمارات تبدوا مقبولة ومختلفة عن باقي الفيلات والعمارات .. اسمها ايه دي؟ اسكان الشباب واسكان المستقبل .. بكام دي؟ .. دي تدفع مقدم حوالي 10 آلاف والباقي اقساط على 20 سنة، ادفع فين ؟ في الجهاز.

 

وظللت أكثر من شهر أبدأ يومي بطوابير من 6 صباحاً لكي اتمكن من دفع مقدم لأحجز شقة 70 متر في آخر دفعة إسكان شباب في القاهرة الجديدة بمقدم حوالي 15 ألف وقسط شهري 350 جنية لمده 20 سنة.

طوابير وزحمة وموظفين مش طايقين نفسهم كأنك بتشحت منهم.

وطبعا كالعاده عند المصريين .. اللي عنده واسطه بيسلك أسرع .. دا غير إن آخر دفعة شقق زيه زي أي مشروع في مصر .. لازم 25% من الاماكن المتميزة بتتحجز لضباط الجيش والشرطة والمخابرات.

 

سألت .. مش ده إسكان شباب ..الشباب الخريجين ومحدودي الدخل؟؟ .. آه

طيب إيه علاقة الجيش والمخابرات والشرطة .. مش دول ليهم مشاريعهم ومساكنهم؟! هكذا سألت بسذاجة .. فرد الموظف بغلاسة .. “الجيش داخل في أي مشاريع في البلد، وأصلاً الأرض بتبقى أرضهم علشان كده هما بيستلموا شققهم الأول قبل الشباب .. البلد بلدهم”

لم أفهم ماذا يقصد الموظف بكلمة “البلد بلدهم”، وأيضاً لم أفهم رغم الشرح لماذا يأخذ ضباط الجيش نسبة من شقق إسكان الشباب رغم ان في كل مكان في مصر مساكن ضباط!

 

تذكرت هذه الذكريات وانا اقرأ اخبار ان دولة الجيش هاتتبرع للمصريين محدودي الدخل بمشروع مليون شقة، وإن دولة الجيش الشقيقة هاتتبرع بالأرض بتاعتهم وهاتديها لشركة اماراتيه .. وان دولة القوات المسلحة الشقيقة تمتلك تقريبا 87% من أجمالي مساحة جمهورية مصر العربية.

تذكرت أيضا كيف كان مبارك يفتتح مشاريع عادية وضرورية وكأنها إنجازات غير مسبوقة وذلك قبل انتخابات الرئاسة ومجلس الشعب.

 

مبارك العظيم كان بيعمل كباري وأنفاق .. رغم ان الكباري والأنفاق هي مشاريع عادية يتم انشائها لحل مشكلة مرورية أو لتطوير المدن أو لاستيعاب الزيادة السكانية، كل دول العالم المتقدمة والمتخلفة لابد أن تقوم بإنشاء طرق وكباري وأنفاق ومترو، الكباري والانفاق لعلاج مشاكل التقاطعات المرورية طبقا للدراسات الهندسية وليست معجزات أو منحة من رئيس!

 

في عامي 2008 و 2009 عملت في مجال المياة وانشاءات محطات المياة ومعالجة الصرف الصحي في شركة اخرى، وشاركت في الاشراف على تنفيذ مشروعات كان مبارك يفتتحها قبل كل انتخابات أو استفتاءات … نفس المحطات ونفي المشروعات يتم افتتاحها هي هي كل سنة .. بعضها شغال بالفعل وبعضها لازال تحت الانشاء بس الريس هايفتتحها كده وكده.

كل فترة يحدث “كربجة” أو “سربعة” .. خلصوا الشغل علشان الريس جاي يفتتح المشروع، “هو مش فتح المشروع ده السنة اللي فاتت؟!” هكذا اسأل .. “بلاش كلام في السياسة يا أحمد يا ماهر خلص شغلك ومالكش دعوة” .. وهكذا كان الرد .. إلى ان تم رفدي والحمد لله في 2010.

 

** السيسي هايعمل زي مبارك ويستغل امكانيات الدولة قبل الانتخابات

**دولة القوات المسلحة هاتتبرع بالارض اللي هي أملاكها الخاصة للمشروع بتاع مصر الشقيقة

** كل أراضي الدولة هي ملك للقوات المسلحة وليس من حق أحد السؤال عن حصيلة بيع الأراضي كل عام .. دولة داخل الدولة ونحن رعايا ليس لنا حق السؤال

** دولة الامارات الشقيقة هاخد الارض من دولة القوات المسلحة الشقيقة علشان يعملوا مساكن للشعب المصري المسكين قبل الانتخابات

** الامارات “نفضت” لمشروع أحمد شفيق و”العطا” بقى على السيسي .. ومصر بقت مفتوحة على البحري للامارات وكل اللي يدفع لدعم أحلام الأوميجا.

ولا فيه حاجة إتغيرت .. ومحدودي الدخل لهم الله

 

أحمدماهر
ليمان طره

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s